Nodir Jalolovich Yodgorov 1978-yil 21-iyulda Buxoro shahrida ziyoli oilada tug‘ilgan. 1995-yilda Buxoro shahridagi 22-sonli umumiy o‘rta ta’lim maktabini a’lo baholarga bitirib, shu yili Buxoro davlat universitetining Badiiy-grafika fakultetiga o‘qishga kirgan.
1999-yilda ushbu fakultetning Chizmachilik va tasviriy san’at yo‘nalishini imtiyozli diplom bilan tamomlagan. 1997–1999-yillar davomida “Behzod” nomidagi arboblar stipendiyasi sohibi bo‘lgan.
Buxoro davlat universitetini tamomlagach, Nodir Yodgorov o‘qishini Nizomiy nomidagi Toshkent davlat pedagogika universiteti magistraturasida davom ettirgan. 2002-yilda ushbu oliygohning Chizmachilik mutaxassisligi bo‘yicha magistratura bosqichini a’lo baholarda tugatgan.
2002–2003-yillarda Nizomiy nomidagi Toshkent davlat pedagogika universitetining Amaliy psixologlar tayyorlash fakultetida sirtqi ta’lim shaklida tahsil olib, amaliy psixolog mutaxassisligini egallagan.
2009-yil 26-fevral kuni Nizomiy nomidagi Toshkent davlat pedagogika universiteti huzuridagi Birlashgan ixtisoslashgan kengashda “Fazoviy almashtirishlar jarayonida o‘quvchilarning bilish faoliyatini rivojlantirish omillari” mavzusida 13.00.02 – Ta’lim va tarbiya nazariyasi va metodikasi (chizmachilik) ixtisosligi bo‘yicha nomzodlik dissertatsiyasini muvaffaqiyatli himoya qilgan.
2022-yilda esa shu sohada – 13.00.02 – Ta’lim va tarbiya nazariyasi va metodikasi (chizmachilik) ixtisosligi bo‘yicha “Bo‘lajak chizmachilik o‘qituvchilarining kasbiy ko‘nikmalarini rivojlantirish metodikasini takomillashtirish” mavzusidagi pedagogika fanlari doktori (DSc) ilmiy darajasini olish uchun yozilgan dissertatsiya ishini muvaffaqiyatli himoya qilgan.
