Buxoro davlat pedagogika institutida “GAP” ayollar IT klubi forumi o‘tkazildi

    Buxoro davlat pedagogika institutida viloyat hokimligi tashabbusi hamda O‘zbekiston Respublikasi Raqamli texnologiyalar vazirligining tegishli topshirig‘i asosida “GAP” ayollar IT klubi doirasida forum tashkil etildi.

    Mazkur tadbir xotin-qizlarning raqamli savodxonligini oshirish, ularni axborot texnologiyalari sohasiga keng jalb etish hamda IT yo‘nalishidagi mavjud imkoniyatlar bilan yaqindan tanishtirish maqsadida o‘tkazildi. Forumda oliy ta’lim muassasalari talaba-qizlari, professor-o‘qituvchilar hamda soha mutaxassislari faol ishtirok etdi.

    Tadbirning asosiy ma’ruzachisi — Kamola Shavkatovna bo‘lib, u “Raqamli dunyoda xotin-qizlar ishtiroki va IT sohasidagi imkoniyatlar” mavzusida mazmunli chiqish qildi. Ma’ruzada raqamli transformatsiya jarayonlarida xotin-qizlarning o‘rni, IT sohasida ta’lim olish va kasb egallash imkoniyatlari, startap loyihalar, zamonaviy kasblar hamda davlat tomonidan yaratilayotgan qo‘llab-quvvatlash mexanizmlari haqida batafsil ma’lumot berildi.

    Shuningdek, forum davomida talaba-qizlar o‘zlarini qiziqtirgan savollarga mutaxassislar tomonidan atroflicha javob oldilar. Ular IT sohasida muvaffaqiyatga erishish yo‘llari, amaliy tavsiyalar hamda real tajribalar bilan tanishdilar.

    Mazkur forum xotin-qizlarning raqamli ko‘nikmalarini rivojlantirish, ularning bandligini ta’minlash va zamonaviy kasblarga yo‘naltirish borasidagi ishlarni yanada kuchaytirishga xizmat qiladi.

    Institut jamoasi kelgusida ham talaba-qizlarning salohiyatini ro‘yobga chiqarish, ularni innovatsion va raqamli yo‘nalishlarga keng jalb etish bo‘yicha tizimli ishlarni izchil davom ettiradi.