Новый шаг на пути международного сотрудничества

Sarlavha:
Xalqaro hamkorlik yo'lidagi yangi qadam — Xitoyning Hunan universitetiga tashrif

Matn:

Buxoro davlat pedagogika instituti O'quv-uslubiy boshqarma boshlig'i Davronov Nurzod Ismoilovich Xitoy Xalq Respublikasida xizmat safari doirasida Hunan provinsiyasining Changsha shahrida joylashgan, dunyoning eng nufuzli universitetlar reytingida Top 1000 talikka kiruvchi yetakchi oliy ta'lim muassasalaridan biri — Hunan universitetiga tashrif buyurdi.

Tashrif davomida universitetning ta'lim jarayonlarini tashkil etish tizimi, ilmiy-tadqiqot faoliyati, zamonaviy boshqaruv mexanizmlari hamda xalqaro hamkorlik yo'nalishlari bilan yaqindan tanishildi. Shuningdek, ta'lim sifatini oshirish, innovatsion pedagogik texnologiyalarni joriy etish va ilmiy salohiyatni rivojlantirishga oid ilg'or tajribalar o'rganildi. Uchrashuvlar chog'ida ikki tomonlama akademik hamkorlikni kengaytirish, professor-o'qituvchilar va talabalar almashinuvini yo'lga qo'yish, qo'shma ilmiy loyihalarni amalga oshirish hamda ta'lim jarayoniga xalqaro tajribalarni tatbiq etish masalalari muhokama qilindi.

Mazkur tashrif Buxoro davlat pedagogika institutining xalqaro aloqalarini mustahkamlash, xorijiy hamkorlar bilan samarali muloqotni rivojlantirish hamda ta'lim va ilm-fan sohasida yangi istiqbolli loyihalarni amalga oshirishga xizmat qiladi.

Xalqaro hamkorlik — ta'lim taraqqiyoti va sifatli natijalar garovi!